Zabaan aik taraf to hukumat aur samaaj ki taaqat ke dhaanche ke saath juri hoi hai to doosri taraf khiyalaat (ya soch ke andaaz) ke saath. Kuch log is ko apni qaumi tashkhees ki alaamat ke tor par bhi istemaal karte hain. Pakistan main kai qaumiyatain hain jin ki alag alag zabaanain hain. Yeh qaumiyatain bhi taaqat hasil karne ke liye zabaan ko aik tashakhus ke zariye ke taor par istemaal karti hain.

Iske alawa zabaan tabqe ki nishaani bhi hai. Angraizi Angraiz haakimon ki nishani hai aur maghrib zadah tabqe ko taaqat deti hai choonke woh achchi nokiriyan behtar angraizi jaanne ki wajeh se hasil kar lete hain. Pakistan ki tamaam zabaanon main se sirf Urdu aur kuch had tak Sindhi to darmiyane ya nichle darje ke nokiriyan dilwa sakti hain magar aur koi zabaan naheen.

Is ke alaawa aik masla yeh bhi hai keh riyasat zabaan sikhane ke liye aisi darsi kitabain istemaal karti hai jin ko parh kar bachche behad qaum parasti aur fauji jarhiyat ke mawafiq ho sakte hain. Lekin aik ajeeb baat yeh bhi hai keh haalanke awaam ko in ki maadri zabaanain aam taor par naheen parhai jateen taaham in main choti choti awaami kitabain chapti hain aur woh bazaar main milti bhi hain.